తెలంగాణలో 375 కిమీ మేర రాహుల్ గాంధీ భారత్ జోడోయాత్ర, రూట్ మ్యాప్ ఖరారు

October 14, 2022

కాంగ్రెస్ పార్టీ తలపెట్టిన ‘భారత్ జోడో యాత్ర’ ఆ పార్టీ అగ్రనేత రాహుల్ గాంధీ నేతృత్వంలో విజయవంతంగా కొనసాగుతున్న విషయం తెలిసిందే. ఈ నేపథ్యంలో భారత్ జోడో యాత్రలో భాగంగా రాహుల్గాంధీ పాదయాత్ర అక్టోబర్ 23వ తేదీన తెలంగాణ రాష్ట్రంలోకి ప్రవేశించనుంది. తెలంగాణలో మొత్తం 375 కిమీ మేర రాహుల్ గాంధీ పాదయాత్ర కొనసాగనుండగా, ఇందుకు సంబంధించిన రూట్ మ్యాప్ కూడా ఖరారైంది. గురువారం హైదరాబాద్ లోని గాంధీభవన్లో ఏఐసీసీ ప్రధాన కార్యదర్శి కేసీ వేణుగోపాల్, టీపీసీసీ ప్రెసిడెంట్ రేవంత్రెడ్డి, రాష్ట్ర వ్యవహారాల ఇంచార్జ్ మాణిక్కం ఠాగూర్, సీఎల్పీ నేత భట్టి విక్రమార్క, ఎంపీ ఉత్తమ్ కుమార్ రెడ్డి సహా పలువురు సీనియర్ నేతలు సమావేశమై తెలంగాణలో రాహుల్గాంధీ భారత్ జోడో యాత్ర రూట్ మ్యాప్, సన్నాహకాలపై చర్చించారు.

ఈ సందర్భంగా రేవంత్రెడ్డి మాట్లాడుతూ, తెలంగాణలో 375 కిమీ మేర భారత్ జోడోయాత్ర జరుగుతుందని, అక్టోబర్ 23న కర్ణాటక నుంచి కృష్ణ రివర్ బ్రిడ్జి మీదుగా మక్తల్ నియోజకవర్గంలోకి రాహుల్ గాంధీ పాదయాత్ర ప్రవేశిస్తుందని తెలిపారు. ఈ యాత్ర హైదరాబాద్‌ మీదుగా మద్నూర్‌ వరకు కొనసాగనుందని చెప్పారు. అక్టోబర్ 31 హైదరాబాద్లోకి ప్రవేశించనుండగా, చార్మినార్ నుంచి నెక్లెస్రోడ్డులోని ఇందిరాగాంధీ విగ్రహం వరకు యాత్ర కొనసాగి, అక్కడే భారీ బహిరంగ సభ నిర్వహించనున్నట్టు రేవంత్రెడ్డి తెలిపారు.

తెలంగాణలో రాహుల్ గాంధీ ‘భారత్ జోడోయాత్ర’ రూట్ మ్యాప్ (375 కిమీ):

రాహుల్ గాంధీ భారత్ జోడోయాత్ర కృష్ణ రివర్ బ్రిడ్జి మీదుగా మక్తల్, దేవరకద్ర, మహబూబ్నగర్ టౌన్, జడ్చర్ల, షాద్నగర్, శంషాబాద్, ఆరాంఘర్, బహదూర్ పురా, చార్మినార్, ఆఫ్జల్ గంజ్, మోజంజహి మార్కెట్, గాంధీభవన్, నెక్లెక్రోడ్, బోయిన్పల్లి, బాలానగర్, మూసాపేట వై జంక్షన్, కూకట్పల్లి, మియాపూర్, బీహెఛ్ఈఎల్, పటాన్చెరు, ముత్తంగి, సంగారెడ్డి క్రాస్ రోడ్, జోగీపేట్, శంకరంపేట్, మద్నూర్‌ వరకు సాగనుంది.

కృష్ణ రివర్ బ్రిడ్జి-మక్తల్: 18 కిమీ
మక్తల్-మహబూబ్నగర్ టౌన్: 65 కిమీ
మహబూబ్నగర్ టౌన్-జడ్చర్ల: 17 కిమీ
జడ్చర్ల-షాద్నగర్: 34 కిమీ
షాద్నగర్-శంషాబాద్: 29 కిమీ
శంషాబాద్-ముత్తంగి(ఓఆర్ఆర్): 60 కిమీ
ముత్తంగి(ఓఆర్ఆర్)-సంగారెడ్డి క్రాస్ రోడ్: 17 కిమీ
సంగారెడ్డి క్రాస్ రోడ్-జోగీపేట్: 37 కిమీ
జోగీపేట్-శంకరంపేట్: 34 కిమీ
శంకరంపేట్-మద్నూర్‌: 64 కిమీ.