ఏపీ శాసనసభలో వ్యవసాయ బడ్జెట్‌ ప్రవేశపెట్టిన మంత్రి కన్నబాబు

March 11, 2022

ఆంధ్రప్రదేశ్ అసెంబ్లీ బడ్జెట్‌ సమావేశాలు కొనసాగుతున్నాయి. ఈ సమావేశాల్లో భాగంగా శుక్రవారం ఉదయం శాసనసభలో రాష్ట్ర ఆర్థిక మంత్రి బుగ్గన రాజేంద్రనాథ్‌రెడ్డి రూ.2,56,257 కోట్ల అంచనా వ్యయంతో 2022-23 సంవత్సరానికి గానూ రాష్ట్ర వార్షిక బడ్జెట్‌ను ప్రవేశపెట్టారు. అనంతరం శాసనసభలో రాష్ట్ర వ్యవసాయ శాఖ మంత్రి కన్నబాబు 2022-23 సంవత్సరానికి గానూ వ్యవసాయ బడ్జెట్ ను ప్రవేశపెట్టారు.

వ్యవసాయ రంగంలో జాతీయ అభివృద్ధి రేటు కన్నా ఏపీ వృద్ధి రేటు అధికంగా ఉందని చెప్పారు. 2020–2021లో జాతీయ స్థాయిలో 7.5 శాతం నమోదు కాగా, ఏపీ 10.39 శాతం వృద్ధి రేటును సాధించిందన్నారు. 2021–2022లో జాతీయ స్థాయిలో వృద్ధి రేటు 9.8 శాతంగా నమోదు కాగా, ఏపీలో వృద్ధిరేటు 14.5 శాతం నమోదైందని తెలిపారు. ఈ ప్రభుత్వం వచ్చిన ఈ 33 నెలల కాలంలో వ్యవసాయ, ఇతర అనుబంధ రంగాల కోసం సుమారు రూ.1.10 లక్షల కోట్లు ఖర్చు చేశామని, అందులో రైతు భరోసా, పీఎం కిసాన్‌ నిధి కోసం రూ.20,117.08 కోట్లు ఖర్చు చేసినట్లు చెప్పారు. వ్యవసాయ రంగం కోసం ఈ వార్షిక బడ్జెట్‌లో రూ.11,387.69 కోట్లు కేటాయించినట్లు తెలిపారు.