కాంగ్రెస్ అధినేత్రి సోనియా గాంధీకి మాతృవియోగం.. సంతాపం తెలిపిన ప్రధాని మోదీ

September 1, 2022

కాంగ్రెస్‌ అధినేత్రి సోనియా గాంధీ ఇంట విషాదం చోటుచేసుకుంది. ఆమె మాతృమూర్తి ‘పావోలా మైనో’ ఇట‌లీలోని త‌న నివాసంలో క‌న్నుమూశారు. ఈ మేరకు ఆగ‌స్టు 27న పావోలా మైనో తుదిశ్వాస విడిచార‌ని, ఆమె అంత్యక్రియలు మంగళవారం ముగిశాయని కాంగ్రెస్ సీనియ‌ర్ నాయ‌కుడు, కాంగ్రెస్ పార్టీ క‌మ్యూనికేష‌న్స్ ఇన్‌చార్జ్ జ‌న‌ర‌ల్ సెక్రెట‌రీ జైరామ్‌ రమేష్‌ ట్విట్టర్‌ వేదికగా ప్రకటించారు. ఈ క్రమంలో తన తల్లి అంత్యక్రియలకు సోనియా గాంధీ ఇటలీ వెళ్లినట్లుగా సమాచారం. ఇక గతంలో ఒకసారి తన తల్లికి అనారోగ్యంగా ఉండటంతో సోనియా గాంధీ ఇటలీకి వెళ్లి వచ్చారు. ఇట‌లీ దేశానికి చెందిన సోనియా గాంధీని మాజీ ప్రధాని రాజీవ్‌ గాంధీ ప్రేమ వివాహం చేసుకున్న సంగతి తెలిసిందే.

Smt. Sonia Gandhi’s mother, Mrs. Paola Maino passed away at her home in Italy on Saturday the 27th August, 2022. The funeral took place yesterday.

— Jairam Ramesh (@Jairam_Ramesh) August 31, 2022

ఇక సోనియా గాంధీకి మాతృవియోగం ఘటనపై పలువురు రాజకీయ ప్రముఖులు తమ సంతాపాన్ని తెలుపుతున్నారు. ఈ క్రమంలో ప్రధానమంత్రి నరేంద్ర మోదీ కూడా దీనిపై స్పందించారు. ఈ మేరకు ఆయన తన ట్విట్టర్‌లో సంతాపం తెలియజేశారు. ‘సోనియా గాంధీజీ తల్లి శ్రీమతి పావోలా మైనో మరణించినందుకు ఆమెకు నా సంతాపం. పావోలా మైనో ఆత్మకు శాంతి చేకూరాలని కోరుకుంటున్నాను. ఈ తీవ్ర దుఃఖ సమయంలో, నా ఆలోచనలు మొత్తం శ్రీమతి సోనియా గాంధీజీ కుటుంబంతో ఉన్నాయి’ అని ప్రధాని మోదీ పేర్కొన్నారు.

Condolences to Sonia Gandhi Ji on the passing away of her mother, Mrs. Paola Maino. May her soul rest in peace. In this hour of grief, my thoughts are with the entire family.

— Narendra Modi (@narendramodi) August 31, 2022