పార్లమెంట్‌లో ప్ర‌ధాని మోదీతో సమావేశమయిన ఎన్సీపీ అధినేత శ‌ర‌ద్ ప‌వార్

April 7, 2022

పార్లమెంట్‌లో ప్రధానమంత్రి నరేంద్రమోదీని నేషనలిస్ట్ కాంగ్రెస్ పార్టీ (ఎన్‌సిపి) అధినేత శరద్ పవార్ ఈరోజు కలిశారు. వీరి భేటీ జాతీయ స్థాయిలో చర్చనీయాంశం అవుతోంది. పార్లమెంట్‌లోని ప్రధాని మోదీ కార్యాలయంలో వీరిద్దరూ దాదాపు 20 నిమిషాల పాటు మాట్లాడారని తెలుస్తోంది. మహారాష్ట్రలో అధికారంలో ఉన్న శివసేన-ఎన్‌సీపీ-కాంగ్రెస్‌ కూటమి నేతలపై ఎన్‌ఫోర్స్‌మెంట్ డైరెక్టరేట్ దర్యాప్తు చర్చల్లో ప్రస్తావనకు వచ్చి ఉండవచ్చునని మీడియా వర్గాలు భావిస్తున్నాయి. మహారాష్ట్ర నేతలను కేంద్ర దర్యాప్తు సంస్థలు టార్గెట్ చేస్తున్నాయని, దీనిపై ఈ సమావేశంలో చర్చించారా అని విలేకరులు అడిగిన ప్రశ్నకు శరద్ పవార్ మేనల్లుడు అజిత్ పవార్, దీని గురించి తనవద్ద సమాచారం లేదన్నారు. “అభివృద్ధి పనులపై దేశ ప్రధాని మరియు పార్టీ జాతీయ అధ్యక్షుడు సమావేశమవుతారు. పార్లమెంటు సమావేశాలు జరుగుతున్నప్పుడు కొన్ని ముఖ్యమైన అంశాలు చర్చించాల్సిన అవసరం ఉంది. అలాంటి సమస్యలు ఉండవచ్చు అని అజిత్ పవార్ వ్యాఖ్యానించారు.

ప్రతిపక్ష రాజకీయ నాయకులను లక్ష్యంగా చేసుకోవడానికి కేంద్ర ప్రభుత్వం దర్యాప్తు సంస్థలను ఉపయోగిస్తోందని శివసేన మరియు ఎన్‌సిపి ఆరోపిస్తున్న నేపథ్యంలో ఈరోజు మోదీ-పవార్ భేటీ కావడం అనేక అనుమానాలకు తావిస్తోంది. ఈ ఉదయం, శరద్ పవార్ పార్టీ ఎన్‌సిపి సీనియర్ నాయకుడు, మహారాష్ట్ర మాజీ హోం మంత్రి అనిల్ దేశ్‌ముఖ్‌ను సీబీఐ కస్టడీలోకి తీసుకుంది. నిన్న ఎన్‌ఫోర్స్‌మెంట్ డైరెక్టరేట్ శివసేన నాయకుడు సంజయ్ రౌత్ భార్య మరియు అతని ఇద్దరు సహచరుల ₹ 11.15 కోట్ల కంటే ఎక్కువ విలువైన ఆస్తులను భూ లావాదేవీలకు సంబంధించిన మనీ-లాండరింగ్ దర్యాప్తులో జప్తు చేసింది. పవార్ నిన్న సాయంత్రం తన ఇంట్లో మహారాష్ట్ర ఎమ్మెల్యేలు మరియు నాయకులతో సమావేశం నిర్వహించారు. పవార్ ఇంట్లో జరిగిన ఈ సమావేశంలో అధికార కూటమికి చెందిన ఎమ్మెల్యేలతో పాటు కేంద్ర మంత్రి మరియు సీనియర్ బిజెపి నాయకుడు నితిన్ గడ్కరీ కూడా పాల్గొన్నారు. విశేషమేమిటంటే, దేశంలోని అత్యంత సీనియర్ ప్రతిపక్ష రాజకీయ నాయకులలో ఒకరైన పవార్ రాష్ట్రపతి ఎన్నికలకు కొన్ని రోజుల ముందు ప్రధానమంత్రితో సమావేశం కావడం. దీనిపైనే ఇప్పుడు అందరి దృష్టి నెలకొంది.