27 దేశాల్లో 780 ‘మంకీపాక్స్’ కేసులు నమోదు, వైరస్ వ్యాప్తిపై అన్ని దేశాలు దృష్టి సారించాలి – ప్రపంచ ఆరోగ్య సంస్థ

June 8, 2022

ప్రపంచవ్యాప్తంగా మంకీపాక్స్ కేసులు పెరుగుతున్న నేపథ్యంలో వైరస్ వ్యాప్తిపై అన్ని దేశాలు దృష్టి సారించాలని ప్రపంచ ఆరోగ్య సంస్థ (డబ్ల్యూహెచ్ఓ) హెచ్చరించింది. జూన్ 2 నాటికి మొత్తం 780 మంకీపాక్స్ కేసులు నమోదయ్యాయి లేదా గుర్తించబడ్డాయని డబ్ల్యూహెచ్ఓ తెలిపింది. ఇప్పటివరకు 27 దేశాలకు ఇది పాకిందని వెల్లడించింది. మే 13వ తేదీ నాటికి ప్రపంచవ్యాప్తంగా 257 మంకీపాక్స్‌ కేసులు వెలుగుచూడగా ఆ తర్వాతి నుంచి జూన్ 2 లోపు 780 కేసులు నిర్ధారణ అయ్యాయని, ఈ ఏడాదిలో ఇప్పటివరకు మంకీపాక్స్‌ వల్ల 7 దేశాల్లో 66 మరణాలు నమోదయ్యాయని పేర్కొంది.

డబ్ల్యూహెచ్ఓ నివేదికల ప్రకారం.. మే 13 నుండి కేసుల పెరుగుదలలో 203% కనిపిస్తోందని తెలిపింది. ఈ వ్యాధిపై ఎపిడెమియోలాజికల్ పరిశోధనలు కొనసాగుతున్నాయని, అలాగే వీటిలో ఎక్కువగా లైంగిక పరమైన కేసులు ఎక్కువగా నివేదించబడ్డాయని వెల్లడించింది. ఇంకా జ్వరం వంటి లక్షణాలకు ముందు శరీరమంతటా స్ఫోటములు కనిపించడం ఈ వ్యాధిలో ప్రధాన లక్షణమని పేర్కొంది. కాగా దీనికి సంబంధించి వ్యాధి గుర్తింపు, కాంటాక్ట్ ట్రేసింగ్, లేబొరేటరీ ఇన్వెస్టిగేషన్, క్లినికల్ మేనేజ్‌మెంట్, ఐసోలేషన్ మరియు ఇన్‌ఫెక్షన్ నివారణ తదితర అంశాలపై ప్రపంచదేశాలకు డబ్ల్యూహెచ్ఓ పలు సూచనలిచ్చింది.