కరోనా నియంత్రణ చర్యల్లో భాగంగా తెలంగాణ రాష్ట్రంలో లాక్డౌన్ విధించిన నేపథ్యంలో గత రెండు నెలలుగా తెలుగు చిత్ర పరిశ్రమ (టాలీవుడ్) కార్యకలాపాలు పూర్తిస్థాయిలో నిలిచిపోయిన సంగతి తెలిసిందే. దీంతో లాక్డౌన్ నిబంధనలకు అనుగుణంగా షూటింగ్ లకు అనుమతులు, థియేటర్స్ తెరవడం తదితర అంశాలపై రాష్ట్ర సినిమాటోగ్రఫీ శాఖల మంత్రి తలసాని శ్రీనివాస్ యాదవ్ ఆధ్వర్యంలో ముఖ్యమంత్రి కల్వకుంట్ల చంద్రశేఖర్ రావు ను తెలుగు సినీ ప్రముఖులు కలిశారు. సీఎం కేసీఆర్ ను కలిసిన వారిలో సినీ నటులు చిరంజీవి, నాగార్జున, దర్శకులు రాజమౌళి, త్రివిక్రమ్, ఎన్.శంకర్, కొరటాల శివ, మెహర్ రమేష్, నిర్మాతలు అల్లు అరవింద్, దిల్ రాజు, రాధాకృష్ణ, సీ. కళ్యాణ్, సురేష్ బాబు, జెమిని కిరణ్, ప్రవీణ్ బాబు తదితరులు ఉన్నారు.
ఈ సందర్భంగా కరోనా సమయంలో చిత్ర పరిశ్రమ ఎదుర్కొన్న సమస్యలు, అలాగే సినీ కార్మికుల కోసం సీసీసీ ద్వారా చేపట్టిన సహాయక చర్యల గురించి సీఎం కు వివరించారు. సినిమా షూటింగులకు అనుమతి ఇవ్వాలని, సినిమా థియేటర్లు తెరిచే అవకాశం ఇవ్వాలని సినీ రంగ ప్రముఖులు సీఎం కేసీఆర్ కు విజ్ఞప్తి చేశారు. దీనికి సీఎం కేసీఆర్ సానుకూలంగా స్పందించారు. సినిమా పరిశ్రమపై ఆధారపడి లక్షలాది మంది జీవిస్తున్నందున రీ ప్రొడక్షన్, షూటింగు నిర్వహణ, థియేటర్లలో ప్రదర్శనలను దశలవారీగా పునరుద్ధరించాల్సిన అవసరం ఉందని సీఎం అభిప్రాయపడ్డారు. తక్కువ మందితో, ఇండోర్ లో చేసేందుకు వీలున్న రీ ప్రొడక్షన్ పనులు మొదట ప్రారంభించుకోవాలని సీఎం కేసీఆర్ చెప్పారు. తర్వాత దశల వారీగా జూన్ మాసంలో సినిమా షూటింగులు ప్రారంభించాలని చెప్పారు. చివరగా అప్పుడున్న పరిస్థితిని బట్టి, సినిమా థియేటర్ల పునఃప్రారంభంపై నిర్ణయం తీసుకుంటామని సీఎం వెల్లడించారు.
సినీ పరిశ్రమ బతకాలని, అదే సందర్భంగా కరోనా వ్యాప్తి కూడా జరగవద్దని సీఎం కేసీఆర్ అన్నారు. అందువలన సినిమా షూటింగులను వీలైనంత తక్కువ మందితో లాక్డౌన్ నిబంధనలను అనుసరించి జరుపుకోవాలని చెప్పారు. అలాగే కరోనా వ్యాప్తి నియంత్రణకు అనుసరిస్తున్న మార్గదర్శకాల ప్రకారం చిత్ర పరిశ్రమ పాటించాలని అన్నారు. ముందుగా ఎంత మందితో షూటింగులు నిర్వహించుకోవాలి? ఎలాంటి జాగ్రత్తలు తీసుకోవాలి? తదితర అంశాలపై సినిమాటోగ్రఫీ శాఖ మంత్రి తలసాని శ్రీనివాస్ యాదవ్, ప్రభుత్వ ప్రధాన కార్యదర్శి సోమేశ్ కుమార్ తో సమావేశమై చర్చించాలని సినీ ప్రముఖులకు సీఎం కేసీఆర్ సూచించారు. అనంతరం ప్రభుత్వం ఖచ్చితమైన మార్గదర్శకాలు రూపొందించి, షూటింగులకు అనుమతి ఇస్తుందని వెల్లడించారు. ఒకసారి షూటింగులు మొదలయ్యాక పరిస్థితులపై కొంత అంచనా వస్తుందని, దానికి అనుగుణంగా సినిమా థియేటర్లు ఓపెన్ చేసే విషయంపై నిర్ణయం తీసుకుంటామని సీఎం కేసీఆర్ తెలిపారు.
మ్యాంగో న్యూస్ యాప్ లింక్స్:
గూగుల్ ప్లే స్టోర్ : https://bit.ly/2R4cbgN
ఆపిల్/ఐఓఎస్ స్టోర్ : https://apple.co/2xEYFJu