తెలంగాణలో ఐసెట్-2023 ప్రవేశ పరీక్షషెడ్యూల్ విడుదల

March 1, 2023

తెలంగాణ రాష్ట్రంలో 2023-24 విద్యా సంవత్సరానికి గానూ ఎంబీఏ, ఎంసీఏ కోర్సుల్లో ప్రవేశాలకు సంబంధించి నిర్వహించే టీఎస్ ఐసెట్-2023 ప్రవేశ పరీక్ష షెడ్యూల్ మంగళవారం విడుదలైంది. 2023 సంవత్సరానికి గానూ ఐసెట్ ప్రవేశ పరీక్షను కాకతీయ యూనివర్సిటీ నిర్వహిస్తున్న సంగతి తెలిసిందే. తెలంగాణ ఉన్నత విద్యామండలి చైర్మ‌న్ ప్రొఫెసర్ ఆర్.లింబాద్రి, కాకతీయ యూనివ‌ర్సిటీ వీసీ టీ.రమేశ్, క‌న్వీన‌ర్ ప్రొఫెస‌ర్ పీ.వ‌ర‌ల‌క్ష్మితో కలిసి ఐసెట్-2023 షెడ్యూల్ ను విడుదల చేశారు. ఐసెట్‌-2023 ప్రవేశ పరీక్ష కోసం మార్చి 6 నుంచి ఆన్‌లైన్ లో దరఖాస్తుల స్వీకరణ ప్రారంభం కానుండగా, ఆలస్య రుసుము లేకుండా మే 6 వరకు స్వీకరించనున్నారు. మే 26, 27వ తేదీల్లో ఉదయం 10 గంటల నుంచి మధ్యాహ్నం 12.30 గంటల వరకు, మధ్యాహ్నం 2.30 గంటల నుంచి సాయంత్రం 5 గంటల వరకు ఐసెట్ పరీక్షను నిర్వహించనున్నారు. ఐసెట్‌ పరీక్షను 14 రీజియన్ సెంటర్లలో 75 పరీక్షా కేంద్రాల్లో నిర్వహించనున్నట్టు తెలిపారు.

టీఎస్ ఐసెట్-2023 పరీక్షషెడ్యూల్:

ఆన్‌లైన్‌లో దరఖాస్తుల స్వీకరణ ప్రారంభం: మార్చి 6
దరఖాస్తుల స్వీకరణ ఆఖరు తేదీ (ఆలస్య రుసుము లేకుండా) : మే 6
ఆలస్య రుసుము రూ.250 తో దరఖాస్తుకు ఆఖరు తేదీ: మే 12
ఆలస్య రుసుము రూ.500 తో దరఖాస్తుకు ఆఖరు తేదీ: మే 18
సబ్మిట్ చేసిన దరఖాస్తును ఎడిట్ చేసుకునే అవకాశం: మే 12 నుంచి మే 18 వరకు
హాల్ టికెట్స్ డౌన్ లోడ్ : మే 22నుండి
ఐసెట్-2023 పరీక్ష నిర్వహణ తేదీలు : మే 26, 27
ప్రిలిమినరీ కీ ప్రకటన : జూన్ 5
ప్రిలిమినరీ కీపై అభ్యంతరాలను సమర్పించడానికి చివరి తేదీ: జూన్ 8 (సాయంత్రం 5 గంటలకు).
ఐసెట్-2023 ఫైనల్ కీ, ఫలితాల విడుదల: జూన్ 20.